Бөхбат бөхийхгүй…

Ээждээ хэнздэж ирсэн ийм нэгэн хүүг би таньдаг юм. Харц нь дэндүү ихийг хүүрнээд байдаг Бөхбат хүүгийн ээж С.Шүрэнцэцэг. Бас л миний нүүр номын найзуудын нэг. Өглөө орой болгон постыг нь харсаар байгаад өнө удаан нөхөрлөсөн юм шиг дотно болчихдог FB найзууд байдаг даа. Уулзаагүй ч уулзсан мэт, гар барьж үзээгүй ч гангар гунгар гээд хөөрөлдчихсөн мэт. Ээж хүү хоёр миний хувьд тийм л эгэл найз. Хүүг би том болж байгаа болов уу гэж анхаарна. Ээж нь хүүгээ өргөөд дийлэхгүй ядарч яваа болов уу гэж заримдаа санаа зовно. Ухаалаг харцтай, тэвчиж сурсан Бөхбат хүү төрөлхийн хоёр түнхний мултралтай, тавхайн хөгжил байхгүй. Тиймээс өгзгөө цоортол хоёр гартайгаа хамжиж байгаад суугаагаараа явна. Өнөөдрийг хүртэл түүнд хоёр хөлөөрөө газар тамгалах боломжийг ямар ч эмч амлаж байгаагүй юм. Учир нь энэ бол түүний хувьд амьд үлдэх, үгүйгээ сорьж, азаа үзсэн том эрсдэл.

 

Харин энэ удаа Казакстаны эмч нар “Хүүг чинь хөл дээр нь босгоно оо, гурван сар шаардагдана” гэж хэлжээ. Тэдэнд 30 сая төгрөг хэрэгтэй. Ээж хүү хоёр эрвийх дэрвийхээрээ л зүтгэж байна.

С.Шүрэнцэцэг эгч номын санч. Бас яруу найргийн хоёр номтой. “Хурд” хамтлагийн ухаарал хөглөсөн олон сайхан дууны үгийг бичсэн. Энгүй энэ орчлонг эгэлхэн туулж яваа, өөрсдийн зовлонг өрөөлд үүрүүлчихгүй юмсан гэж чадлаараа хичээдэг ийм л ээж хүү хоёр. Удахгүй тэд явна, хүний газар хүнд хэцүүг үүрнэ. Гэхдээ хөлтэй болоод ирнэ. Бөхбат хүү бөхийхгүй. Яг ийм зовлонг туулж яваа олон олон хүүхдэд шинэ боломж байгаа гэдгийг харуулна.

 

Үүний тулд тэдэнд таны сэтгэлийг тээсэн хандив хэрэгтэй. Эсвэл Шүрэнцэцэг эгчийн шүлгийн номыг худалдан авбал та хүүг өргөөд босголоо л гэсэн үг. Нэг ном, нэг уншигч аянд нэгдэж, “Цэцэгс дуулж ургадаг” номыг хүргэлтээр авахыг хүсвэл, Бөхбат хүүгийн бөхийж нугараагүй тэвчээрт тулах цэг болмоор байвал 99764906 утсаар учир явдлыг мэдээрэй .

 

За манайхаан, FB-гээс асуулга ирээд бдаг болохоор данс энэ тэр тавьж болохгүй бна. Утсаар нь уйгагүй холбогдоорой.

Эмүжин