ШШҮХ-ийн дарга Б.Ядамдорж шинэ оны өмнөхөн үүрэгт ажлаа ДХИС-иас ирсэн, цагдаагийн угшилтай хурандаа Б.Болдбаатар гэгчид өгсөн билээ. Дарга солигдохтой зэрэгцэн шилэн дансны хөтлөлт нь өөрчлөгдөж, зарим тушаал шийдвэр, тэтгэвэр тэтгэмжийг нууцалсан байх юм.
Уг нь өмнөх даргын үед тушаал шийдвэр, тэтгэвэр тэтгэмж, буцалтгүй тусламж гээд бүхий л мэдээлэл нь ил байдаг байв. Харин 2021 оны 12-р сараас эхлэн тус байгууллагын шилэн дансны мэдээлэл тодорхой хэмжээнд хязгаарлагдмал болжээ.
Тухайлбал, Б.Ядамдорж даргын үед хэн хэн тэтгэвэрт гараад хэдэн төгрөгийн тэтгэмж авч байсан нь ил тод байдаг байв. Харин Б.Болдбаатар даргын үед мэдээлэл хаалттай болж, байгууллагын өмнөх дарга Б.Ядамдоржийн тэтгэвэрт гарсан мэдээлэл нууцлагджээ.
Сураг сонсох нь ээ Б.Ядамдорж тэтгэвэрт гарахдаа 36 сарын цалинтай тэнцэх хэмжээний мөнгө болох 80 гаруй сая төгрөгийн тэтгэмж авсан гэх мэдээлэл байна.
Б.Ядамдоржийн мэдээллийг нууснаар удахгүй тэтгэвэртээ гарах Б.Болдбаатар хурандаа мөн өөрийнхөө тэтгэвэрт гарах тэтгэмжийн мэдээллийг нууцлах боломжтой болж байгаа юм.
ШШҮХ-ийн дарга нь тэтгэвэртээ гарч байхад түүний ажлыг ХОЁР НАСААР АХ хүн хүлээн авсан нь олон хүний инээдийг хүргэсэн. Цаад шалтгаан нь шагналаа авсан гэх мэдээлэл байхад тэтгэврээ өндөр тогтоолгох гэж ШШҮХ-ийн дарга болсон гэх мэдээлэл ч байдаг.
Дээрх албан бус мэдээллийн аль нь ч үнэн бай хамаагүй, Б.Болдбаатар даргаа шилэн дансаа зарим мэдээллийг нууц хаахгүй хөтлөөчээ.
Өнөөдрийг хүртэл шилэн дансны тухай хуулийг мөрдөөгүй хэргээр ял сонсоон хүн байхгүй болохоор Хуул зүйн яамны харъяа агентлаг нь ийнхүү “даам гарч” байх магадлалтай.
Тэтгэврийн нас нь болсон цагдаагийн угшилтай хурандаа нарын тэтгэвэрт гарах эцсийн зогсоол нь ШШҮХ болсон талаар болон шилэн дансны хөтлөлтийн талаар бид ШШҮХ-ийн дарга Б.Болдбаатараас тодруулан эргэж мэдээлэх болно.
А.Баярмаа
