Өчигдөр Т.Аюурсайхан нарын 11 хүнд холбогдох хэргийн урьдчилсан хэлэлцүүлэг Баянзүрх, Сүхбаатар, Чингэлтэй дүүргийн эрүүгийн хэргийн анхан шатны шүүхэд боллоо. Шүүх хурлын үеэр буюу яллагдагч Б.Ганхуягийг үг хэлж байх хооронд шүүх танхимд хулгана гүйж буй бичлэг цахим орчинд тарав.
Үнэндээ шүүхийн салбарт сүүлийн хэдэн жил барилга барих санхүүжилт олгоогүй, байрны хүрэлцээ муу, ачаалал их байгаа. Тухайлбал, Баянзүрх, Сүхбаатар, Чингэлтэй дүүргийн эрүүгийн хэргийн анхан шатны шүүхийн байр актлагдсан болохоор хэзээ мөдгүй нурах нь цаг хугацааны асуудал болсон билээ.
Харин актлагдсан уг барилгад ажиллаж байгаа ажилчдынх нь сэтгэл дутсан уу? Санхүүжилт нь дутсан уу гэгээн цагаан өдөр шүүхийн танхимд хулгана гүйж байгаа шившгээ дэлгэв.
Уг бичлэг гэхдээ эвлүүлэг гэх мэдээлэл гарав. Эвлүүлэг мөн ч бай биш ч бай ШҮҮХ ХУЛГАНАТАЙ болохыг олон нийт мэддэг.
Хэрэв шүүхийн тамгын газрын дарга нь сэтгэлтэй байсан бол хортон шавж, хулганын хор тогтмол цацуулаад байвал арай ч жоом, хулганадаа дарагдахгүй. Улиралдаа дээд тал нь 100 000 төгрөг л болно.
Актлагдсан байрандаа засвар хийх санхүүжилтээ сүүлийн гурван жил хасуулсан шүүхийнхэн хэрвээ мөнгөгүй бол ядаж муур аваад тэжээх хэрэгтэй шүү дээ. Муур заавал үнэтэй худалдаж авах шаардлагагүй. Фэйсбүүкийн Азтай савар групп руу ороод муур үрчлээд авчихвал хулганын асуудал шийдэгдэх биз. Шүүхийн байрыг хамгаалдаг цагдаа нар нь муураа ажлын цагаар сэтгүүлчдийг хашиж хаадаг шигээ хааж боогоод байж болох биз. Харин шөнө оройн цагаар муураа тавьчихвал муур ажлаа сайн хийх бизээ.
Хулганадаа баригдсан шүүхийнхэн энэ асуудлаа яаралтай шийдэхгүй бол нэг л өдөр хавтаст хэрэг, нотлох баримт хулганын хоол болох вий!!! Тэр цагт Итгэлт баяны хэлдэг үгийг хэлээд ч нэмэргүй болж олон хүний эрх ашиг зөрчигдөх биз?
Аливаа шүүхийн тамгын газрын дарга, Шүүхийн ерөнхий зөвлөлийн тэргүүнтэй холбоотойгоор шүүхийн санхүүжилт, нүүр царай тодорхой харагдаж байгаа. Шүүхийнхэн ажилдаа дарагдаж, ачаалал ихтэй байж болох ч ядаж ингэж шүүх засаглалын нэр хүндийг сэвтээхгүй байхад анхаарах ёстой. Шүүхийн ерөнхий зөвлөлийг сэтгэлгүй, чадваргүй дарга нар удирдаж, шүүхийн үйл ажиллагаанд нь дэмжлэг үзүүлж чадахгүй байгаа нь өнөөдөр шүүхийн байранд хулгана гүйлдэж байгаагийн гор нь Баянзүрх, Сүхбаатар, Чингэлтэй дүүргийн эрүүгийн хэргийн анхан шатны шүүхэд гарч хулгана гүйлдэж байгаагийн тод жишээ юм.
Баянзүрх, Сүхбаатар, Чингэлтэй дүүргийн эрүүгийн хэргийн анхан шатны шүүхийн тамгын газрын даргад хулганын хор авах төсөв, муур авахад унаа тэргээр хангаж өгөх сэтгэлтэй байгууллага нэг биш байгааг энэ дашрамд дуулгая.
