Зуд болоход нохой зоолно, зовлон учрахад лам баяжина гэдгийн бодит жишээг цар тахлын үед О.Амартүвшин тэргүүтэй МҮХАҮТ харуулсан бөгөөд ААН-үүдийг “шулсан” юм.
Цар тахлын хүнд үед Замын-Үүдийн боомтоор хил нэвтрүүлэх авто машины зохицуулах эрхийг засгийн газраас Монголын Үндэсний Худалдаа аж үйлдвэрийн танхимд олгосон байна. Өдөрт хил нэвтэрч байгаа машинуудад компани, аж ахуй нэгжийн барааг хуваарилах эрхийг гартаа атгаж байсан учраас нэвтрүүлэх зохицуулалтыг хийхдээ авлига хээл, хахууль авсан байж болзошгүй гэдгийг гишүүд нь шүүмжилж байна. Энэ үеэр бараа бүтээгдэхүүний үнэ тэнгэрт хадаж, бас танхим зохицуулах нэрээр цөөн компанид давуу эрх олгож байсан нь нууц биш. Тухайн үед Монгол Улсын Шадар сайдаар ажиллаж байсан Я.Содбаатар хүртэл энэ талаар МҮХАҮТ-ынхан анхааруулга, сануулга өгч байжээ. Ганцхан жишээ дурьдахад Ковидоос өмнө Танхим “ Хүнд нөхцөлийн гэрчилгээ” буюу Force majeure-ийн гэрчилгээг 100 000- 150 000 төгрөгөөр олгож байсан. Гэтэл Ковидын үед даруй 10 дахин нэмэгдэж 1 500 000 мянган төгрөгт хүрсэн байна. Ийнхүү нэмснээ булзааруулж цар тахлын үеийн хөнгөлөлт гэсэн нэрээр 750 мянган төгрөгөөр гишүүддээ олгож байжээ.
Үнэндээ Монголын Үндэсний Худалдаа аж үйлдвэрийн танхимын үүрэг бол гишүүн байгууллагуудаа дэмжих, хөтөч нь чиглүүлэгч нь болох эрхэм зорилго үүрэгтэй атлаа бодит байдал дээр тэднийгээ шулдаг, хуурдаг төдийгүй үүнийг дагаад иргэдийн нуруунд үнийн дарамт авчирдаг болоод удаж байна.
