“Сэтгэлээс цойлсон өнчин ганганаа Сэмрүүлэн сэмрүүлэн буцлаа гэж үү дээ” хэмээн нуугдмал сэтгэлийн торгон алчуурыг сэмэртэл, нуугисан зүрхний үзэсгэлэнт шувуухайг гансартал дуулах нь хөнгөхөн гунигтай.
Монгол Улсын Урлагийн гавъяат зүтгэлтэн Бадарчийн Бямбабаярын аялгуу, Ц.Юндэнгийн аялгуугаар бүтсэн уг дуу бол “Эрт буцсан ганганаа” юм.
Тас.мн сайтын нэгэн онцлох дахин давтагдахгүй булан бол “Харьцуулалт” юм. Бид хэн нэгнийг талцуулах зорилго үгүй. Харин ч нэгэн уран бүтээлийг хэн хэн амилуулсанг нэг дороос сонсож, хэн сайн амилуулсанг уншигч та бүхэнд үлдээдэг. Бид энэ удаа “Эрт буцсан ганганаа” дууг онцлож байна.
Уянгын дууны хаан гэж болох, уярал ухаарлын дуунуудыг дийлэнхдээ хүргэдэг уран бүтээлч бол Монгол улсын гавъяат жүжигчин Лосолын Болдбаатар юм. Уг уран бүтээлийг анх амилуулан түмэн олондоо хүргэсэн нь тэр билээ.
МУГЖ Л.Болдбаатар- “Эрт буцсан ганганаа”
Монголын ард түмний чихэнд эгшиглээд арав гаруй жил болж буй уг дууг анх удаа эмэгтэй хоолойгоор сонсох боломжтой болсон. Энэ бол эртний сайхан дуунуудыг дуулдаг дуучин бүсгүй Б.Наранцогт юм. Тэрээр тун удахгүй болох тоглолтондоо зориулж “Эрт буцсан ганганаа” дууг өөрийнхөөрөө амилуулжээ.
МУСТА Б.Наранцогт “Эрт буцсан ганганаа”
Хааяа нэг эморохдоо сонсох дуртай “Эрт буцсан ганганаа” уран бүтээлийг хэн сайн амилуулсанг эрхэм уншигч та бүхэн дор бүрнээ тунгаах биз ээ.
Б.Мөнхжаргал
