Дуу гэдэг өөрийн хувь заяатай гэдэгт би итгэдэг. Энэ удаа та бүхэндээ сүүлийн үед ард олны сонсох дуртай болоод байгаа нэгэн уран бүтээлийг хэн хэн, хэрхэн амилуулсанг хүргэхээр бэлтгэлээ. Уг уран бүтээл бол Төрийн соёрхолт, МУГЖ Догмидын Сосорбарамын шүлэг, хөгжмийн зохиолч С.Энхтайваны хөгжим “Хүмүүн заяаны өлгий” юм.
Уг уран бүтээлийг Төрийн соёрхолт, МУГЖ Догмидын Сосорбарам өөрөө анхлан дуулсан байдаг. Д.Сосорбарам бол дууг өгүүлэмжтэй дуулдаг эрхэм гэдгийг монголын ард түмэн хэдийнэ мэдэх билээ.
Төрийн соёрхолт, МУГЖ Догмидын Сосорбарам “Хүмүүн заяаны өлгий”
Уг уран бүтээлийг тийм ч олон уран бүтээлчид дуулсан нь үгүй. Харин ӨМӨЗО-ы ахан дүүсийн маань нэг энэ уран бүтээлийг өөрийнхөөрөө дуулсан байдаг. Тэр эрхэм бол ӨМӨЗО-ны Шилийн гол аймгийн “Улаан мөчир” хамтлагийн дуучин, МУСТА П.Алтанбүргэд юм.
Энэ дууг дахин түмэн олонд хүргэсэн гэхэд хилсдэхгүй уран бүтээлчид бол Уртын дуучин Б.Алтанжаргал, “Voice of Mongolia” шоуны ялагч Э.Дашням нар юм. Тэд “Хүмүүн заяаны өлгий” дууг Архангай аймгийн 100 жилийн ойд зориулан хамтран дуулсан.
Б.Алтанжаргал, Э.Дашням “Хүмүүн заяаны өлгий”
