Монголын boyband-үүдээс хамгийн эмо сонсогчтой, уярал, хайрын дуутай хамтлаг тодруулах бол түүнд “Мотив” хамтлаг тэргүүлэх нь гарцаагүй. СУИС-ийн нэг ангийн дөрвөн залуу хүсэл мөрөөдөл, зорилгодоо үнэнчээр уран бүтээлээ туурвисаар 15 жилийг ардаа орхижээ.
Арван таван жил гэдэг тийм ч богино хугацаа биш. Энэ арван таван жилд “Мотив”-чууд хагацал учрал, уйтгар гуниг, баяр жаргал, хайр дурлал, уучлал ухаарлыг дуулжээ. Тэдний сонсогчид тэдэндээ хамт уйлж, уяарч, эморч байлаа.
Zaisan hill цогцолбор хөл гишгэх зайгүй пиг дүүрэг. Сүүлийн үед томоохон тоглолтууд энд л зохион байгуулагдах болсон. Гэвч Мотивынхонд багадах шиг. “Цасан бороо” дуугаар догдлол дүүрэн эхэлсэн тоглолт “Өвлийн хайрын дуу”-гаар үргэлжилж эхний хэсэг эхлэв. Энэ эхлэл хэсэг бол хамгийн нандин дурсамжуудаа эргэн санах хэсэг байсан мэт санагдана. Үзэгчид дуу бүрийг нь дагаж дуулна. Мотив үзэгчидээ, үзэгчид Мотивоо санажээ.
Арван таван жилийн ойд ах, эгч нарынх нь төлөөлөн баяр хүргэн ирж, чимэг болон ая дуугаа өргөлөө. Үзэсгэлэнт бүсгүй Б.Баярцэцэг гоо үзэсгэлэнгээ гайхуулан, уяруулсан бол Дижитал хамтлагийн ах нар нь “Галзуу ганц”-аараа доргиов. Яаж зүгээр байхав сүүлийн үед хит болж буй бүхий л эмо дууг “үйлдвэрлэгч” Дижиталын Эрка тайзан дээр яаж эмордогийгоо Мотивын фэнүүдэд л харуулав.
Уран бүтээлчид бие биенээ хэрхэн дэмждэг, хүндлэл гэж юу байдгийг үүнээс мэдэрч болмоор. Мотив бол урлагийнхан дундаа, тэднээсээ асар их итгэл, хүндлэлийг хүлээсэн хамтлаг гэдгийг хүрэлцэн ирж уран бүтээлээ хүргэсэн, хамтдаа догдолж тайзны ард цугласан эрхэмүүдээс харж болохоор байлаа.
Арван таван жилийн ойн тоглолтоо Мотивынхон гурван хэсэгтэй байхаар төлөвлөжээ. Тоглолтын эхний хэсгийн дуунуудаа бүжиг дэглэлтэйгээр хүргэсэн бол үргэлжлүүлэн “Уучлалт гуйхыг минь хүлээж байна уу”, “Чи надад хайртай юу”, “Дурлалын домог” зэрэг дуунуудаа амьд хөгжимтэйгөөр дуу уран бүтээлүүдээ шинэчлэн хүргэж, төгсгөлийн хэсэг хүндэтгэлийн арга хэмжээгээр шргэлжилж тэнд хуран цугларсан үзэгч, сонсогчиддоо баярын бэлгээсээ хүртээлээ.
Дуулсан дуу болгоныг нь танхим дүүрэн үзэгчид даган дуулж, уяран хайлж, өнгөрсөн дурсамжуудаа санагалзан байлаа. Мотивтой уярч өнгөрүүлсэн үдшийг тодорхойлох ганц үг нь “Гайхалтай” байлаа.
