Л.Нурбулан
Инээмсэглэл авч байгаа хүнийг баяжуулдаг атлаа өгч байгааг нь үгүйрүүлдэггүй. Эгэл амьдралд өнгө нэмж, гэрэл гэгээ цацруулан сэтгэл зүрхээ, алт шиг үнэтэй цаг хугацаа, хүч хөдөлмөрөө зориулан байж ард олондоо инээд бэлэглэгч гэмээнэ чухам та бидний дунд тоотой хэдхэн хэрнээ эгэл даруухан орших тэр л ховорхон эрхмүүд байдаг. Энэ олон авьяастнууд дундаас алиалагч гэж чухам ямархан хүмүүс байдаг юм бол.
Алиалагч гэхээр хамгийн түрүүнд Нэрт алиалагч, жүжигчин Т.Латиф агсны бага хүү, жүжигчин Л.Нурбулан бодогдоно. Тэр бол инээд бэлэгчлэгчийн үр сад байлаа.
Түүний тоглолтын онцлог нь илбэ үзүүлэх, хөгжилтэй хошин шог, хөдөлгөөнт жүжиг, хүүхдүүдийг дууриаж элэглэх маягаар хүүхэд, багачуудад ухаарал, инээд хөөрийг зэрэг бэлэглэдэг. Түүний тоглолтыг үзсэн хүүхдүүдийн нүдэнд нь гал бадарч, инээд баяраар дүүрэн гэрэлтэх нь үнэхээр сэтгэл хөдлөм сайхан санагдана.
Монголын циркийн урлагт олон жилийн хөдөлмөрөө зориулж, инээд хөөр бэлэглэж ирсэн тэрээр уушгины буглаа өвчнөөр оношлогдож, БНХАУ-ын Шанхай хотноо хагалгаандаа амжилттай орж, эх орондоо ирсэн ч тэнхрэхгүй байсаар насан эцэслэсэн.
Монгол улсын соёлын тэргүүний ажилтан, жүжигчин Л.Нурбуланы инээд хөөр бэлэглэх буянтай үйлсэд уран бүтээлээрээ оруулсан хувь нэмрийг, гэнэн цайлган, дандаа инээж явдаг хүүхдийн цагаахан сэтгэлийг бид үүрд дурсан санах болно.
