Сэрэмжлүүлэг: Хоригдлууд архидаж, нэгнээ хутгалжээ
Төв аймгийн Баян суман дахь Хорих 415-р ангийн малын хэсэгт ажиллаж байсан хоригдлууд 02-р сарын 06-д архидан согтуурч, 23:00 цагийн үед хоорондоо зодолдсон байна. Улмаар нэгийгээ хутгалж гэмтээсэн хэрэг гарчээ.
Тодруулбал, ШШГЕГ-ын харьяа нээлттэй, хаалттай хорих 415-р ангид ял эдэлж байсан ялтан Л.О нь согтуурсан үедээ ялтан Г.У-ын зүүн далан тус газарт нэг удаа хутгалж, гэмтэл учруулсан ажээ. Тиймээс тухайн хоригдлыг яаралтай Хорих 401-р ангийн эмнэлэгт хүргэсэн бөгөөд одоо хэвтэн эмчлэгдэж байгаа аж. Хутгалуулсан гэх хоригдлын биеийн байдал хэвийн байгаа гэх мэдээлэл байна.
Хоригдлууд ажил хийж болох ч архидан согтуурах хориотой байдаг. Тиймээс бид шүүхийн шийдвэр гүйцэтгэх байгууллагаас хаана хяналт алдаж, ийнхүү гэмт хэрэг бүртгэгдэх болсон талаар тодруулан эргэж мэдээлэх болно.