Жүжигчин гэхээсээ илүү дуучин гэдгээрээ үзэгчийн анхаарлыг татсан залуу уран бүтээлч бол С.Идэрмаа. Оюутны ширээнээс салаагүй байхдаа “Зүрхний хилэн” киноны Сүглэгмаагийн дүрийг бүтээсэн тэрээр “Ангарагаас ирсэн эмэгтэй” жүжгийн дуу, “Нүд” зэрэг соло уран бүтээлийг гаргасан.
Аав ээж нь боломжийн амьдралд охиноо өсгөсөн гэдгийг түүний эдлэж хэрэглэж буй зүйлс, биеэ авч яваа байдал, уран бүтээлд хандах хандлагаас харж болно. Тэрээр өөрийнхөө ертөнцийн талаар хэвлэлд ярихдаа “Үнэн байх юм сан гэж хичээдэг. Би үнэн, худлын талаар цөөнгүй ном уншсан. Үнэн гэдэг энгийн юм шиг хэрнээ гүнзгий агуулгатай үг. Хүн худлаа хэлэх болгондоо хүнд өртэй болж амьдардаг. Нэг л удаа хэлчихсэн бол түүнийгээ үнэн болгохын тулд чамгүй цаг хугацаа, сэтгэл зарцуулах хэрэгтэй болно. Эсвэл залруулах боломж олдохгүй ч байж мэднэ. Үнэнд өртэй амьдрахад хүний амьдрал хэтэрхий богино шүү дээ.
Хэдий хүнд, хэцүү байсан ч үнэнээс зугтахгүй амьдарвал илүү жаргалтай болно гэж боддог” гэж байв.
