Нэгэн цагт залуусын сэтгэл зүрхийг дуу хоолой, уран бүтээлээрээ байлдан дагуулж байсан хамтлаг бол “Guys”. “Хайрын бүжиг”, “Хөөрхөн охин”, “Амьдрал үргэлж сайхнаараа” “Нулимс”, “Навч”, “Цас”, “Чамдаа зориулъя” гээд бүхий л дуу нь хүүхэд залуусын дунд өнөөдөр ч хит хэвээрээ байгаа.
Өдгөө 27 жилийн түүхтэй тус хамтлагийн гишүүд өдгөө 40 насны босго давсан эрчүүд болсон. Бага залуугаасаа охидын шүтээн болж явсан тэд хэрхэн өөрчлөгдснийг сонирхуулж байна.
Хамтлагийн ахлагч М.Мягмар
Дуучин гэхээсээ илүүтэй чөлөөт уран бүтээлч, жүжигчин гэдгээрээ олонд нэртэй явдаг М.Мягмар монголын халуухан залуусын нэг. Нэгэн нэр хүндтэй эмэгтэйгээс “залуудаа царайгаараа гавихгүй явсан ч, 40 нас хүрээд гоё залуусын тоонд орсон” гэх тодотголыг хүртэж явсан тэрбээр Гоёо брэндийн рекламны нүүр царай болж байв. Мөн “Ану хатан” киноны Галдан бошигтын дүрд тоглож явсан тэрбээр “Захиа”, “Сайн уу, ээжээ” зэрэг соло уран бүтээлээрээ алдартай.
Хамтлагийн гишүүн А.Төгсбаяр
Хамтлагийнхнаасаа хамгийн даруухан гэх тодотголтой явж ирсэн А.Төгсбаяр кино урлагтаа үнэнчээр үлдсэн. Хэд хэдэн дэлгэцийн уран бүтээлд найруулагчаар ажиллаж байсан тэрбээр ковидын он жилүүдийн өмнө “Орчлонг чимсэн цэцэг” хэмээх бие даасан уран бүтээлийг үзэгчдийн хүртээл болгож байв. Цацагдаж эхэлсэн даруйдаа л сонсогчдоосоо магтаалын үг хүртэж буй тус дууны үг, аяыг А.Төгсбаяр өөрөө зохиосон гэдэг.
Хамтлагийн гишүүн Х.Бат-Ундрал
Хамтлагийнхнаасаа хамгийн өхөөрдөм, сахилгагүй дүр төрхийг бүтээдэг тэрбээр амьдрал дээр ч хамгийн их “чих халууцуулдаг” нь. Х.Бат-Ундрал буюу Уугий.
Хүүхдэрхүү өхөөрдөм төрхтэй гэгдэж байсан Уугий олонд танигдсан 27 жилийн хугацаанд хоёр амьдралаа босгожээ. Энэ удаад тэрбээр өөрөөсөө цөөнгүй насаар дүү бүсгүйтэй хуримлаж, хоёр хүүхдийн эцэг эх болсон байна.
Дуучин залуугийн хувьд анхны амьдралаа 18 насандаа эхлүүлж, хөөрхөн хүүгийн эцэг болж явсан түүхтэй. Хүү нь хэдийнээ эрийн цээнд хүрсэн том залуу болж, өдгөө АНУ-д ээжтэйгээ хөрш зэрэглээ амьдардаг гэж байгаа.
Хамтлагийн гишүүн Д.Лхагва
1997 онд хамтлаг анх байгуулагдаад олны өмнө гарч ирэх үед тус хамтлагийн гишүүн Д.Лхагва охидын анхаарлыг өөртөө хамгийн их татдаг нь байсан гэдэг. Энэ ч утгаараа үе тэнгийхэн дундаа хөөрхөн хөвгүүн гэгддэж явсан тэрбээр тайз, дэлгэцийн урлагийг хослуулан яваа. Тэрбээр өнгөрсөн жил Оросын нэрт зохиолч Фёдор Михайлович Достоевскийн алдарт “Гэм зэм” жүжгийн гол дүр болох Раскольниковийн дүрийг “Орфей” театрт “амилуулсан” юм. Түүнийг мөн л хоёр дахь амьдралаа зохиосон гэх яриа байдаг.
