Рок попын амьд домог гэгддэг “Харанга хамтлагийнхан хэдийнээ 60 насыг давсан “өвөө” нар болсон.

Орчлонгийн сайн муу, сайхан муухайг энэ биеэрээ мэдэрч яваа тэд өөрсдийн цахим хуудаснаа тэр бүр уриалга гаргаад байдаггүй.

 

Харин тус хамтлагийн гишүүн, ая зохиогч Чулуунбат буюу Чука өөрийн цахим хуудаснаа “ӨВДСӨН ҮЕД ХЭНИЙ ГАРЫГ ХАРДАГ ВЭ” гэсэн пост оруулжээ.

Тэрээр “Өвдөж зовох үед ээж аав, хань ижил, үр хүүхдүүд, найз нөхөд, хамаатан садангууд бүгд л биднийг чадлынхаа хэрээр хайрлаж халамжилдаг. Сандарсан үедээ лам, бөө, үзмэрч тэр байтгуй хэн нэгнээр сохроор мэрэглүүлж үзүүлж харуулдаг.
Би тэсэж тэсэж саяхан ОМИКРОН гэдэгтэй нүүр туллаа. Азаар хөнгөн тусаж эмч сувилагч нарынхаа ачаар босоод ирлээ. Сахрын өвчин маань л дээшээ нэг доошоо нэг гэж баахан сандраалаа. Би энд юу гэхгээд байна вэ гэхээр Монголын нийт эмнэлгийн эмч, сувилагч, үйлчлэгч нар нойр хоол, цаг наргүй ажиллаж /тангараг өргөсөн ч/ нэгэн сэтгэлээр шургуу зүтгэлтэй ажиллаж байна. Миний хэвтэж байсан Яармагийн шинэ эмнэлгийнхэн өөрснөө хоёроос дөрвөн удаа энэ өвчнөөр өвдсөн ч ажлаа хийгээд өөрөө өөрсдийгөө эмчилж байгаа эмнэлгийн дарга, эмч, сувилагч, ажилтан нарыг яг үнэн бодитоор нь харлаа. Ямар хэцүү, хүнд нөхцөлд бидний төлөө ажиллаж байгааг хараад үнэхээр тэд нараараа бахархлаа. 1000 гаруй өвчтөнүүдийн дунд 30 гаруйхан эмч,сувилагч, үйлчлэгч байна гээд боддоо. Энэ бүхний цаана асар их СЭТГЭЛ байгааг л харлаа. Үнэхээр цалин бага…бүүр бага. Өөрийгөө болоод амьдралаа бодоод цалин арай ахиу хувийн эмнэлэгт очиж байгаа хүмүүсийг буруутгаж бодсонгүй ээ.
Харин бид ээрч унахдаа яаран байж эмчээ гээд гүйж очдог эрүүл мэндийн нийт албан хаагчдын дундаж цалинг ЯДАЖ 2 сая төгрөг болгож болохгүй гэж үү??? БОЛНО.

Эрх мэдэлтнүүд , Эдийн засагчид, хууль санаачлагчид, МУ-н засгийн газар өөр юу юу байдаг юм ухаан бодол авьяас гэж байдаг бол+сэтгэлээ нэмээд үүнийг хийгээч.

Олон үр ашиггүй урсаж байгаа /ашиггүй зардлууд мэдээж байгаа/ мөнгийг тас ХААГААД зөвхөн эрүүл мэндийн нийт ажилтан албан хаагчдад зориулсан мөнгийг босгоод өгөөч. Та нар чаднаа. Хэн ч барьцахгүй! хэн ч үгүйсэхгүй! Бид бусдаар тэсээд гарч чаднаа.
ЗӨВХӨН ҮҮНИЙГ Л ХИЙЧИХ” гэжээ.