Улсын ургацын комиссын 2023 оны хуралдаан өнөөдөр Хүнс, Хөдөө Аж Ахуй, Хөнгөн Үйлдвэрийн яаманд боллоо. 
2023 онд улсын хэмжээгээр 369.3 мянган га-д үр тариа, үүнээс 345.4 мянган га-д улаанбуудай, 18.4 мянган га-д төмс, 13.9 мянган га-д хүнсний ногоо, 89.3 мянган га-д малын тэжээл, 131.7 мянган га-д тосны ургамал, 7 мянган га-д жимс, жимсгэнэ, нийтдээ 629.6 мянган га-д тариалалт хийсэн байна.
Ургацын урьдчилсан балансаар 501 мянган тонн үр тариа хураах аж.
Үүнээс
- 472.2 мянган тонн улаанбуудай,
- 165 мянган тонн төмс,
- 165.7 мянган тонн хүнсний ногоо,
- 64.8 мянган тонн тосны ургамал,
- 225.6 мянган тонн малын тэжээлийн ургамал,
- 5 мянган тонн жимс жимсгэнэ тус тус хураан авах боломжтой гэсэн төлөв гарчээ.
“Хүнсний ногоо 18, малын тэжээл 42 хувиар өсөх урьдчилсан төлөв гарч байна”
Урьдчилсан балансаас харахад улаанбуудай, төмсний хэрэгцээг 100 хувь, хүнсний ногооны 81.3 хувийг дотоодын ургацаас хангах боломж бүрдэж байгаа бөгөөд улаанбуудайн үйлдвэрлэл өнгөрсөн оноос 70 мянган тонн буюу 17 хувиар, хүнсний ногооны үйлдвэрлэл 25.7 мянган тонн буюу 18.3 хувиар, малын тэжээл 67.2 мянган тонн буюу 42.4 хувиар өсөхөөр байна.
Энэ талаар ХХААХҮ-ийн сайд Х.Болорчулуун “Энэ оны ургацын баланс эерэг дүнтэй гарч байна. Хүнсний ногооны тариалалт сүүлийн 30 жилийн хугацаанд анх удаа 80 хувийг давлаа. Хэдийгээр зарим газар усанд автаж, цочир хүйтэрч ургац алдсан ч гэсэн хүнсний ногооны хангамж сайн байх төлөв харагдаж байна.
Бид дандаа гаднаас импортын улаанбуудай авч байсан. Энэ жил импортын улаанбуудай авахгүйгээр дотоодоос 100 хувь хангах төлөв харагдаж байна. Гэхдээ тариа гэдэг бол хурааж авсан хойноо л авлаа гэхээс биш цаг агаарын байдал нөлөөлдөг. Яамныхан болон ургацын комиссынхон өнөөдөр хуралдаж, өөрсдөөсөө шалтгаалах зохион байгуулалтын ажлаа ярилцлаа” хэмээв.
Харин Увс, Хэнтий, Дорнод, Сүхбаатар, Өвөрхангай зэрэг аймгуудад зуны эхэн үед хур тунадас бага орж гандуу байсан, мөндөрт цохиулах зэргээр байгалийн давагдашгүй хүчин зүйлийн нөлөөгөөр ургамлын өсөлт хөгжилт саарч, ургацын болц жигд бус, ургацын хэмжээ өмнөх жилүүдээс харьцангуй буурахаар байна.
Цаг агаарын урьдчилсан мэдээгээр есдүгээр сарын дунд 10 хоногийн эцсээр тариалангийн бүс нутгаар хур тунадас нойтон цас орж цочир хүйтрэх төлөвтэй байна. Тиймээс ургац хураалтын ажлыг технологийн хугацаанд үр дүнтэй, шуурхай зохион байгуулах үүднээс ургацын зам, гүүрний эвдрэл гэмтлийг шуурхай засварлах, ургац хураалтад оюутан, сонсогчид, иргэдийг ажиллуулах боломж, нөхцөлөөр хангах чиглэлээр холбогдох төрийн байгууллагуудтай хамтран ажиллаж байгаа аж.
