“Монгол газрын тос боловсруулах үйлдвэр” төрийн өмчит компанийн инжнер, техникийн ажилтнууд Эрдэнэт үйлдвэрийн үйл ажиллагаатай танилцав. Тус компани Энэтхэг улсын Засгийн газрын хөнгөлөлттэй зээлээр Газрын тос боловсруулах үйлдвэр байгуулах төсөл хэрэгжүүлж буйтай холбогдуулан өөрийн мэргэжилтнүүдээ бэлтгэх, туршлага дадлага судлуулах зорилгоор Эрдэнэт үйлдвэртэй хамтран ажиллаж байна.
Энэ хүрээнд тус үйлдвэрийн мэргэжилтнүүд Эрдэнэт үйлдвэрийн Ил уурхай, Баяжуулах үйлдвэр, Засвар механикийн завод, Дулааны цахилгаан станц, Хаягдлын аж ахуй зэрэг үйлдвэрлэлийн үндсэн цехүүдээр орж, Ус хангамжийн цехийн цэвэр ус дамжуулах 820 мм-ийн 3-р шугам барьж байгуулах бүтээн байгуулалтын явцтай танилцсан байна. Мөн Төр нийгмийн нэрт зүтгэлтэн Ю.Цэдэнбалын нэрэмжит “Эрдэнэт үйлдвэр” ТӨҮГ-ын музейг үзэж сонирхов.
Монгол улсад нефть химийн аж үйлдвэрийн цоо шинэ салбарыг хөгжүүлэх стратегийн чухал ач холбогдолтой газрын тос боловсруулах үйлдвэр байгуулах, тэнд нарийн мэргэжлийн инженер техникийн ажилтнуудыг бэлтгэхэд Эрдэнэт үйлдвэрийн мэргэжилтнүүдийн арвин туршлага, дэмжлэг туслалцаа нэн шаардлагатай. Тиймээс эхний ээлжинд инженер техникийн багийнхан туршлага судалж байна гэж уг төслийн ажлын хэсгийн ахлагч онцлов. Газрын тос боловсруулах үйлдвэр байгуулах төсөл 2017 оноос хэрэгжиж буй бөгөөд одоо бүтээн байгуулалтын ажлаа эхлээд байна.
