Сагсан бөмбөгийн спорт сонирхогчдын баяр талархлыг хүлээсэн, олон улсын стандартад нийцсэн гэх спортын ордон саяхан нээгдэж, одоогоос сар гаруйн өмнө томоохонтэмцээн зохион байгуулсан билээ. Баянгол дүүргийн III хорооны нутагт “Уран ган” төвийн хашаанд барьсан “UG arenа”-д арваннэгдүгээр сарын 10-14-нд сагсан бөмбөгийн Азийн аварга шалгаруулах тэмцээний урьдчилсан шатны D хэсгийн тоглолт болсныг уншигчид санаж буй.
Олон улсын эл тэмцээнд манайхаас гадна Тайланд, Малайз, Таити, Вьетнамын шигшээ багийн тамирчид ирж өрсөлдсөн юм. Тэгвэл энэ тэмцээн болсон “UG arena” спорт цогцолборын барилгыг олон улсын тэмцээн болж байх тухайн үед Улсын комисс хүлээж аваагүй байж. Тэр үед нь ямар нэг эрсдэл учирч, гадаад, дотоодын олон тамирчин, үзэгчдийн эрүүл мэнд, аминд аюул тохиолдсон бол барилгыг хүлээж аваагүй Улсын комисс буруутах уу, эсвэл түүнийг барьсан компанийнхан буруутай болох уу гэдэг асуулт урган гарна. Сагсанбөмбөгийн Азийн аварга шалгаруулах тэмцээний урьдчилсан шатны тоглолтоос нэлээд хойш, өнгөрсөн сарын 29-нд нийслэлийн Засаг даргын хэрэгжүүлэгч агентлаг Хотын стандарт, хяналтын газраас 01/669 дугаартай албан бичгийг холбогдох байгууллагад хүргүүлсэн аж. Уг албан тоотод “Уранган” ХХК-ийн захиалгаар барьсан, сагсанбөмбөг, олон зориулалтын танхимын цогцолбор барилгыг ашиглалтад оруулах В99-2210-001777 дугаартай захиалагчийн хүсэлт, баримтад үндэслэн барилга байгууламжийг ашиглалтад оруулах комиссын үйл ажиллагааг нийслэлийн Засаг даргын 2022 оны А/861 захирамжийн шийдвэрээр байгуулагдсан 17 гишүүний бүрэлдэхүүнтэй комисс Барилгын тухай хууль, Засгийн газрын 2021 оны 212 дугаар тогтоолоор баталсан Барилга байгууламжийг ашиглалтад оруулах дүрмийн дагуу батлагдсан хуваарь ёсоор 2022 оны аравдугаар сарын 25-нд захиалагчтай хамтран зохион байгуулж ажилласан. Комисс тухайн барилга байгууламжийн баримт бичиг, барилгын ажилтай танилцан үзлэг хийж, ашиглалтад оруулахтай холбоотой асуудлаар гишүүд хариуцсан асуудал тус бүрээр санал гарган илэрсэн зөрчил, дутагдлыг арилгуулах хугацаатай үүрэг даалгаврыг захиалагчид өгсөн. Комиссын нийт гишүүний өгсөн үүрэг даалгаврыг биелүүлж гарын үсгийн баталгаажуулалт бүрэн дуусаагүй тул одоогоор барилга байгууламжийг ашиглалтад оруулах комиссын дүгнэлт гараагүй болно” хэмээсэн байна. Үүнээс үзэхэд “Уранган” компанийнхан улсын комисст хүлээлгэж өгөөгүй “UG arena” цогцолбортоо олон улсын тэмцээн зохион байгуулсан нь тодорхой болов. Өөрөөр хэлбэл, “Уранган” компанийн удирдлага Барилгынтухай хуулийн 37.6-д заасан “Дуусаагүй, дууссан боловч ашиглалтад оруулаагүй барилга байгууламжийг ашиглахыг хориглоно” гэсэн заалтыг зөрчсөн гэсэн үг. Барилгын тухай хуулийн холбогдох заалтыг зөрчсөн үйлдэлд нь Зөрчлийн хуулийн дагуу хариуцлага тооцох ч үндэслэл болж байгаа юм. Албан бус эх сурвалжийн мэдээлснээр “UG arena” спорт цогцолборыг улсын комисс хүлээн авсан гэж байгаа ч Хотын стандарт, хяналтын газрынхан нь “Комисс ажилласанч дүгнэлт баталгаажаагүй” гэсэн хариу өгч буй.
Энэ спорт цогцолборын барилгаа Б.Лхагвасүрэн захиралтай “Уранган” компанийнхан хууль зөрчин барьсанч холбогдох байгууллагынхан яаж ч чадаагүйг батлах баримт бидэнд ирлээ. Нийслэлийн Мэргэжлийн хяналтын газраас энэ оны тавдугаар сард өмгөөлөгч Ц.Гансүхэд хандан өгсөн албан бичигт“Уранган” ХХК-ийн 1681100067 нэгж талбарын дугаартай, үйлчилгээний зориулалтаар олгосон уг газарт барилгын ажлын зөвшөөрөл, гэрчилгээгүйгээр угсралтын ажил гүйцэтгэсэн асуудалд 2021 оны наймдугаар сарын9-нд Зөрчлийн тухай хуулийн дагуу арга хэмжээ тооцож, эрх бүхий албан тушаалтны албан даалгавар хүргүүлж байсан. Гэвч тус албан даалгаврын хэрэгжилт хангагдаагүй тул 2022 оны гуравдугаар сард нийслэлийнЗахиргааны хэргийн анханшатны шүүхэд албан тоот хүргүүлсэн байдаг. Мөн Засгийн газрын11-11 төвд иргэнээс гаргасан гомдлын дагуу шалгаад зөрчлийн хэрэг нээж, ашиглалтад хүлээн аваагүй барилга байгууламж ашигласан “Уранган” ХХК-д Зөрчлийн тухай хуулийн дагуу арга хэмжээ тооцож, эрх бүхий албан тушаалтны албан даалгавар өгсөн” хэмээжээ. Тэгэхээр “UG arena” спорт цогцолборыг анхнаасаа хууль зөрчин барьж, ашиглалтад оруулахаар зүтгэж байгаа бололтой.
Барилгын ажил зөвшөөрөлгүй явуулж, цогцолбор баригдаж дуусаж байхад нийслэлийн Хот байгуулалт, хөгжлийн газраас “Уранган” ХХК-д 2022 оны зургадугаар сарын7-нд барилгын ажлын зөвшөөрлийн 389/2022 тоот гэрчилгээг нөхөн олгосон гэх мэдээлэл бий. Өөрөөр хэлбэл, нэг жилийн хугацаанд зөвшөөрөлгүй барилга угсралтын ажил гүйцэтгэсэн компанид хэн нэгэн албан тушаалтан нөлөөлж гэрчилгээ нөхөн олгосон, эсвэл хуурамчаар бүрдүүлсэн байж болзошгүй юм. Тиймээс хууль, хяналтын холбогдох байгууллагынхан “UG arena”-г барьсан “Уранган” компанийнхны барилгын ажил эрхлэх зөвшөөрөл, хууль зөрчсөн ч үл ойшоож байгаа зэргийг нарийвчлан шалгаж, тэдэнд давуу байдал олгосон төрийн албан хаагчид байдаг бол хариуцлага тооцож, шударга ёс тогтоохгүй бол хэн нэгэн мөнгөтэй хүн барилга дураараа барьж байснаа сүүлд нь хуульд заасан гэрчилгээ, зөвшөөрөл зэргийг нөхөн бүрдүүлдэг тогтолцоо бий болох вий. Өөрөөр хэлбэл, барилгын салбар дахь авлига, албан тушаалын гэмт хэрэг гарах бас нэг шалтгаан болж болзошгүй байна.
“UG arena” спорт цогцолборт дотоод, гадаадын тэмцээн уралдаан зохион байгуулахаар төлөвлөсөн бол уг барилгыг нь улсын комисс хүлээн автал түр азнах шаардлагатайг ташрамд сануулъя.
